US Banking Outage | మొన్న మైక్రోసాఫ్ట్.. నిన్న ఎయిర్లైన్స్.. నేడు బ్యాంకులు.. అమెరికాను వెంటాడుతున్న సాంకేతిక సమస్యలు!

US Banking Outage | అగ్రరాజ్యం అమెరికాను వరుస సాంకేతిక సమస్యలు కలవరపెడుతున్నాయి. మైక్రోసాఫ్ట్ సేవల్లో అంతరాయం, విమానయాన రంగంలో ఏటీసీ నెట్వర్క్లో సాంకేతిక సమస్యలు తలెత్తిన కొద్దిరోజులకే తాజాగా ప్రముఖ బ్యాంకుల వ్యవస్థలు కూడా మొండికేశాయి. సాంకేతిక సమస్యల కారణంగా ఆన్లైన్ బ్యాంకింగ్ సేవల్లో కస్టమర్లకు తీవ్ర ఇబ్బందులు తలెత్తాయి.
ముఖ్యంగా జేపీ మోర్గాన్ చేజ్ (JPMorgan Chase) వ్యవస్థలో తలెత్తిన సాఫ్ట్వేర్ బగ్ కారణంగా వేలాది మంది ఖాతాదారులు తమ ఖాతాలను యాక్సెస్ చేయలేక, నగదు లావాదేవీలు పూర్తి చేయలేక ఇబ్బందులు పడ్డారు. ఈ ప్రభావం ఇతర బ్యాంకులతో జరిగే లావాదేవీలపైనా పడటంతో బ్యాంక్ ఆఫ్ అమెరికా, వెల్స్ ఫార్గో, యూఎస్ బ్యాంక్, ట్రూయిస్ట్ ఖాతాదారులపై కూడా పడింది.
చేజ్ సేవలపై వేలల్లో ఫిర్యాదులు
సోమవారం ఉదయం నుంచే అమెరికాలోని పలు బ్యాంకుల ఆన్లైన్ సేవలను వినియోగించడంలో సమస్యలు మొదలయ్యాయి. ఈ సమస్య గురించి డౌన్డిటెక్టర్ వెబ్సైట్లో భారీగా ఫిర్యాదులు వచ్చాయి. ముఖ్యంగా అమెరికాలో ఆస్తుల పరంగా అతిపెద్ద బ్యాంక్ అయిన చేజ్ సేవలపై ఫిర్యాదులు వెల్లువెత్తాయి. ఫార్చ్యూన్ కథనం ప్రకారం.. మధ్యాహ్నం 1.30 గంటల (స్థానిక కాలమాన ప్రకారం) తర్వాత సుమారు 4,500 ఫిర్యాదులు నమోదుకాగా.. 2.22 గంటల సమయానికి ఆ సంఖ్య 20 వేలు దాటింది. సీబీఎస్ న్యూస్ ప్రకారం.. మధ్యాహ్నం 2 గంటల సమయానికి చేజ్ సేవలపై దాదాపు 4,800 మంది సమస్యలను నివేదించారు.
ఖాతాదారులు తమ ఆన్లైన్ ఖాతాల్లోకి లాగిన్ కాలేకపోవడం, బ్యాలెన్స్ చెక్ చేసుకోలేకపోవడం, నగదు బదిలీలు, వైర్ ట్రాన్స్ఫర్లు పూర్తి చేయలేకపోవడం వంటి సమస్యలు ఎదుర్కొన్నారు. మొబైల్ బ్యాంకింగ్ సేవల్లోనూ ఇబ్బందులు తలెత్తాయి. కొన్ని చేజ్ బ్యాంకు శాఖల్లోనూ లావాదేవీలు నిలిచిపోయినట్లు కస్టమర్లు తెలిపారు. టెక్సాస్లోని డల్లాస్ శాఖకు వెళ్లిన ఓ ఖాతాదారుడు చెక్కు డిపాజిట్ చేయడానికి ప్రయత్నించగా.. సిస్టమ్ పనిచేయడం లేదని సిబ్బంది చెప్పినట్లు సీబీఎస్ న్యూస్కు వివరించాడు. మరికొందరు నగదు డిపాజిట్లు, ఉపసంహరణలు చేయలేకపోయారు.
సైబర్ దాడి కాదు.. సాఫ్ట్వేర్ బగ్ వల్లే సమస్య!
తమ ఆన్-ప్రిమైజ్ హార్డ్వేర్ సిస్టమ్లలో సాఫ్ట్వేర్ బగ్ కారణంగా తాత్కాలిక సమస్య తలెత్తినట్లు జేపీ మోర్గాన్ చేజ్ ప్రతినిధి వెల్లడించారు. ఇది సైబర్ దాడి కాదని, అలాంటి ఆధారాలేవీ లేవని స్పష్టం చేశారు. ఖాతాదారులు తమ ఖాతాలు, నిధులను యథావిధిగా యాక్సెస్ చేయవచ్చని.. అయితే కొన్ని లావాదేవీలు పూర్తవడానికి సాధారణం కంటే ఎక్కువ సమయం పడుతోందని తెలిపారు. సమస్యను వీలైనంత త్వరగా పరిష్కరించేందుకు ప్రయత్నిస్తున్నట్లు పేర్కొన్నారు.
ఇది మొత్తం బ్యాంకింగ్ వ్యవస్థను ప్రభావితం చేసిన సమస్య కాదని చేజ్ స్పష్టం చేసింది. తమతో లావాదేవీలు జరిపే సందర్భాల్లో మాత్రమే ఇతర బ్యాంకులకు ఆలస్యం ప్రభావం ఉండవచ్చని వివరించింది. అంటే ఇతర బ్యాంకుల వ్యవస్థలు పూర్తిగా నిలిచిపోలేదని, చేజ్తో అనుసంధానమైన లావాదేవీల్లో మాత్రమే కొందరు ఖాతాదారులకు సమస్యలు ఎదురయ్యాయని తెలిపింది.
జెల్లే చెల్లింపులపైనా ప్రభావం
అమెరికాలో ప్రముఖ డిజిటల్ చెల్లింపుల ప్లాట్ఫామ్ అయిన జెల్లే (Zelle) ద్వారా నగదు పంపడం, స్వీకరించడంలోనూ కొందరు ఖాతాదారులు ఇబ్బందులు ఎదుర్కొన్నారు. అయితే తమ నెట్వర్క్ సక్రమంగానే పనిచేస్తోందని జెల్లే స్పష్టం చేసింది. బ్యాంకుల సాంకేతిక సమస్యల వల్ల తమ వేదిక ద్వారా జరిగే చెల్లింపుల్లో ఆలస్యం ఏర్పడవచ్చని తెలిపింది. యూఎస్ బ్యాంక్ కూడా తమ వ్యవస్థలు నేరుగా ప్రభావితం కాలేదని వెల్లడించింది. అయితే ఇతర ఆర్థిక సంస్థలతో జెల్లే ద్వారా నగదు పంపే లేదా స్వీకరించే ఖాతాదారులకు లావాదేవీల్లో ఆలస్యం ఎదురయ్యే అవకాశం ఉందని పేర్కొంది. జెల్లేను ఎర్లీ వార్నింగ్ సర్వీసెస్ నిర్వహిస్తోంది. ఈ సంస్థలో బ్యాంక్ ఆఫ్ అమెరికా, క్యాపిటల్ వన్, జేపీ మోర్గాన్ చేజ్, పీఎన్సీ బ్యాంక్, ట్రూయిస్ట్, యూఎస్ బ్యాంక్, వెల్స్ ఫార్గో వంటి ప్రముఖ బ్యాంకులు భాగస్వాములుగా ఉన్నాయి.
జెల్లే ద్వారా వినియోగదారులు నేరుగా ప్రత్యేక ఖాతాను నిర్వహించరని, వారి ఖాతాలు, నిధులను సంబంధిత బ్యాంకులు, క్రెడిట్ యూనియన్లే నిర్వహిస్తాయని సంస్థ ప్రతినిధి వివరించారు. అందువల్ల బ్యాంకుల వ్యవస్థల్లో సమస్యలు తలెత్తినప్పుడు జెల్లే చెల్లింపులపైనా ప్రభావం పడే అవకాశం ఉంటుందని తెలిపారు.
ఇతర బ్యాంకుల వివరణ.. చేజ్ సేవలు పునరుద్ధరణ
డౌన్డిటెక్టర్లో బ్యాంక్ ఆఫ్ అమెరికా, వెల్స్ ఫార్గో, యూఎస్ బ్యాంక్, ట్రూయిస్ట్, క్యాపిటల్ వన్ ఖాతాదారుల నుంచి కూడా ఫిర్యాదులు నమోదయ్యాయి. దీంతో ఆయా బ్యాంకులు స్పందించాయి. బ్యాంక్ ఆఫ్ అమెరికా తమ వ్యవస్థలు సాధారణంగానే పనిచేస్తున్నాయని సీబీఎస్ న్యూస్కు తెలిపింది. క్యాపిటల్ వన్ కూడా తమ సేవలకు ఎలాంటి అంతరాయం లేదని స్పష్టం చేసింది. రాయిటర్స్ ప్రకారం.. బ్యాంక్ ఆఫ్ అమెరికా, వెల్స్ ఫార్గో ఈ సమస్యపై స్పందించలేదు.
వెల్స్ ఫార్గో మాత్రం తన వెబ్సైట్లో ఆన్లైన్ బ్యాంకింగ్ సేవల్లో సాంకేతిక సమస్యలు ఉన్నట్లు ప్రకటించింది. ఖాతాదారులు ఏటీఎంలు, బ్యాంకు శాఖలు, ఫోన్ బ్యాంకింగ్ సేవలను వినియోగించుకోవాలని సూచించింది. మరోవైపు సోమవారం సాయంత్రానికి చేజ్ సమస్యను పరిష్కరించినట్లు ప్రకటించింది. లావాదేవీలు మళ్లీ సాధారణంగా కొనసాగుతున్నాయని వెల్లడించింది.
వరుస సాంకేతిక అంతరాయాలతో ఆందోళన
ఇటీవల అమెరికాలో కీలక సేవలకు సంబంధించిన సాంకేతిక వ్యవస్థల్లో వరుసగా అంతరాయాలు ఏర్పడటం ఆందోళన కలిగిస్తోంది. గత గురువారం మైక్రోసాఫ్ట్ సేవల్లో ప్రపంచవ్యాప్తంగా అంతరాయం మొదలై.. శుక్రవారం వరకూ కొనసాగింది. ఔట్లుక్, టీమ్స్, ఏఐ అసిస్టెంట్ కోపైలట్ సహా పలు సేవలు ప్రభావితమయ్యాయి. ప్రపంచవ్యాప్తంగా సంస్థలు, ప్రభుత్వ కార్యాలయాలు, పాఠశాలలు, ఆసుపత్రుల కార్యకలాపాలపైనా దీని ప్రభావం పడింది. శనివారం నాటికి సేవలను పునరుద్ధరించినట్లు మైక్రోసాఫ్ట్ ప్రకటించింది. ఈ అంతరాయానికి సైబర్ దాడి కారణం కాదని సంస్థ తెలిపింది.
ఇదే సమయంలో గత శుక్రవారం అమెరికా ఫెడరల్ ఏవియేషన్ అడ్మినిస్ట్రేషన్ (FAA) విమానాల రాకపోకలపై దేశవ్యాప్తంగా తాత్కాలిక ఆంక్షలు విధించింది. ఎయిర్ ట్రాఫిక్ కంట్రోల్ వ్యవస్థలోని కమ్యూనికేషన్ పరికరాలు, నెట్వర్క్లో సమస్య తలెత్తడంతో విమానాల బయలుదేరడాన్ని నిలిపివేసింది. ఈ అంతరాయం నాలుగు గంటలకు పైగా కొనసాగి వేలాది విమానాల ఆలస్యం, రద్దుకు దారితీసింది. పాత పరికరాలు, నిర్వహణ పనుల సమయంలో కొత్తగా అమర్చిన రౌటర్ కారణంగా నెట్వర్క్లో సమస్య ఏర్పడినట్లు అధికారులు వివరించారు. ఇక సోమవారం యునైటెడ్ ఎయిర్లైన్స్ కూడా విస్తృత స్థాయి సాంకేతిక అంతరాయాన్ని ఎదుర్కొంది. దీంతో కొన్ని విమానాల బయలుదేరడంలో ఆలస్యం ఏర్పడింది. కొన్ని గంటల్లోనే సమస్యను పరిష్కరించినట్లు సంస్థ ప్రకటించింది.
Comments (0)