Twisha Sharma | త్విషా శర్మ మృతి కేసు.. సీబీఐ, గిరిబాలా సింగ్‌కు సుప్రీంకోర్టు నోటీసులు

Twisha Sharma : సంచలనం సృష్టించిన త్విషా శర్మ మృతి కేసు విచారణ కొనసాగుతోంది. దీనిలో భాగంగా కేసును విచారిస్తున్న సీబీఐకి, అలాగే కీలక నిందితులుగా ఉన్న త్విష భర్త సమర్ద్ సింగ్, అతడి తల్లి గిరిబాలా సింగ్‌కు సుప్రీంకోర్టు నోటీసులు జారీ చేసింది. ఈ కేసు విచారణను భోపాల్ నుంచి ఢిల్లీకి మార్చాలంటూ త్విషా శర్మ తండ్రి దాఖలు చేసిన పిటిషన్‌పై విచారణ సందర్భంగా సుప్రీం ఈ నోటీసులు జారీ చేసింది.

త్విష తండ్రి పిటిషన్‌పై స్పందన తెలియజేయాల్సిందిగా కోర్టు కోరింది. ఇదే సమయంలో కేసు విచారణపై కోర్టు మధ్యంతర స్టే విధించింది. అంటే, ఈ కేసును ఢిల్లీకి మార్చే అంశం తేలేవరకు విచారణ కొనసాగించకూడదని సీబీఐని ఆదేశించింది. ఢిల్లీకి చెందిన మోడల్, నటి అయిన త్విషా శర్మకు, భోపాల్‌కు చెందిన సమర్ధ్ సింగ్‌కు గత ఏడాది డిసెంబర్‌లో వివాహం జరిగింది. పెళ్లి తర్వాత నుంచి భర్త సమర్ధ్ సింగ్, అతడి తల్లి, త్విష అత్త గిరిబాలా సింగ్ వరకట్నం కోసం వేధించారు. ఈ క్రమంలో ఈ ఏడాది మే 12న త్విషా శర్మ అనుమానాస్పదంగా మరణించింది.

త్విష ఆత్మహత్య చేసుకుందని భర్త, అత్త తెలిపారు. అయితే, అత్తింటివారే చంపారని, వారి వేధింపుల వల్లే త్విష చనిపోయిందని ఆమె తండ్రి ఆరోపించారు. దీంతో త్విష మృతి పెద్ద సంచలనం రేపింది. వరకట్న వేధింపులకు ఈ ఘటన ఉదాహరణగా నిలిచింది. దీంతో కేసు తీవ్రత దృష్ట్యా ఈ కేసును మధ్యప్రదేశ్ కోర్టు విచారణను సీబీఐకి అప్పగించింది. భోపాల్‌లోని ట్రయల్ కోర్టులో విచారణ జరుగుతోంది. అయితే, ఈ కేసు విచారణను భోపాల్ నుంచి ఢిల్లీకి మార్చాలని త్విష తండ్రి తాజాగా సుప్రీంకోర్టులో పిటిషన్ దాఖలు చేశారు. దీంతో ఈ అంశంపై సుప్రీంకోర్టు నోటీసులు జారీ చేసింది.