Rudrabhishekam | వేయిస్తంభాల రుద్రేశ్వరస్వామికి 51 లీటర్ల ఆవుపాలతో రుద్రాభిషేకం

16 November 2026 - 23:30
0 0
Rudrabhishekam | వేయిస్తంభాల రుద్రేశ్వరస్వామికి 51 లీటర్ల ఆవుపాలతో రుద్రాభిషేకం
Karthikamasam

హనుమకొండ చౌరస్తా : చారిత్రక రుద్రేశ్వర స్వామి వేయి స్తంభాల దేవాలయంలో కార్తీకమాసం ప్రథమ సోమవారం పురస్కరించుకొని స్వామివారికి 51 లీటర్ల ఆవుపాలతో రుద్రాభిషేకం (Rudrabhishekam)  నిర్వహించారు. దేవాదాయ ధర్మాదాయ శాఖ సిబ్బంది అందించిన 200 రూపాయల సేవా టికెట్లు ద్వారా 350 మంది దంపతులు గర్భాలయంలో ఉన్న రుద్రేశ్వరస్వామికి ఆలయ అర్చకులు నమక చమకములతో భక్తులు ఆ రుద్రేశ్వరునికి పాలు, పెరుగు, తేనె, నెయ్యి, చక్కర పంచామృతాలతో నవరసాలతో నారీకేల జలాభిషేకాలు నిర్వహించారు.

సుమారు 10 వేల మంది భక్తులు ఉదయం నుంచి సాయంత్రం వరకు స్వామివారిని దర్శించు కున్నారు. భక్తులందరికీ తీర్థప్రసాదాలు అందించారు. మధ్యాహ్నం 1 గంటకు స్వామివారికి షోడశోపచార పూజలు నిర్వర్తించి స్వామి వారిని వివిధ పుష్పాలతో అలంకరించి ధూపదీప నైవేద్యాలు సమర్పించారు. సాయంత్రం 6 గంటల నుంచి ప్రదోషకాల సమయంలో భక్తుల కోరికపై రుద్రాభిషేకాలు నిర్వర్తించారు.

ఈ పూజా కార్యక్రమంలో బీఆర్‌ఎస్ పార్టీ రాజ్యసభ సభ్యులు వద్దిరాజు రవిచంద్ర సోదరుడు వద్దిరాజు వెంకటేశ్వర్లు-ఉమాదేవి దంపతులు, కాజీపేట ఏసీపీ ప్రశాంత్‌రెడ్డి దంపతులు, ప్రముఖ న్యాయవాదులు, న్యాయమూర్తులు పాల్గొని పూజలు నిర్వహించుకున్నారు. ఆలయ ఈవో డి.అనిల్‌కుమార్‌ భక్తులకు ఇలాంటి ఇబ్బంది కలగకుండా క్యూలైన్లు, తాగునీటి సౌకర్యం ఏర్పాటు చేశారు. భక్తులు క్యూలైన్లలో ఓం నమశ్శివాయ అంటూ స్వామివారిని దర్శించుకున్నారు. వైదిక కార్యక్రమాలను ఆలయ ప్రధానార్చకులు గంగు ఉపేంద్రశర్మ, వేద పండితులు మణికంఠశర్మ, దత్త కుమార్‌శర్మ, ప్రణవ్‌ నిర్వహించారు.

Comments (0)

User