RBI Interest Rate | మున్ముందు వడ్డింపులే.. వడ్డీరేట్లు కనీసం 50-75 బేసిస్‌ పాయింట్లు పెంచనున్న ఆర్బీఐ!

18 November 2026 - 07:30
0 0
RBI Interest Rate | మున్ముందు వడ్డింపులే.. వడ్డీరేట్లు కనీసం 50-75 బేసిస్‌ పాయింట్లు పెంచనున్న ఆర్బీఐ!
Rbi1
  • ఇక ఆర్బీఐ కఠిన ద్రవ్య సమీక్షలే
  • వడ్డీరేట్లు కనీసం 50-75 బేసిస్‌ పాయింట్లు పెరిగే అవకాశం
  • 6.25 శాతానికి రెపోరేటు చేరవచ్చన్న అంచనాలు

RBI Interest Rate | ముంబై, నవంబర్‌ 17: వడ్డీరేట్లు పెరుగనున్నాయా? రాబోయే ద్రవ్య సమీక్షల్లో రిజర్వ్‌ బ్యాంక్‌ (ఆర్బీఐ) రెపోరేటును మరింతగా పెంచబోతున్నదా? అంటే.. అవుననే సమాధానాలే నిపిస్తున్నాయిప్పుడు. భౌగోళిక-రాజకీయ అనిశ్చిత పరిస్థితులు, స్థిరత్వం లోపించిన ముడి చమురు ధరలు, విజృంభిస్తున్న ద్రవ్యోల్బణం.. కీలక వడ్డీరేట్లను ఎగదోసేలా ఉంటున్నాయి మరి. ఈ క్రమంలోనే దాదాపు రెండేండ్ల కింద కనిపించిన స్థాయికి మళ్లీ వడ్డీరేట్లు చేరుతాయన్న అభిప్రాయాలు వ్యక్తమవుతున్నాయి. ప్రస్తుతం 5.5 శాతంగా ఉన్న రెపోరేటును రానున్న నెలల్లో మరో 50 నుంచి 75 బేసిస్‌ పాయింట్లు పెంచి 6.25 శాతానికి ఆర్బీఐ తీసుకెళ్లవచ్చని మెజారిటీ ఆర్థికవేత్తలు, బ్యాంకింగ్‌, కీలక రంగాల నిపుణులు అంచనా వేస్తున్నారు. బ్యారెల్‌ ముడి చమురు ధర ఇంకా 100 డాలర్ల దరిదాపుల్లో ఉండటం, అంతర్జాతీయ పెట్టుబడిదారుల సెంటిమెంట్‌ బలహీనపడుతుండటం ఈ అంచనాలకు బలం చేకూరుస్తున్నాయి.

ద్రవ్యోల్బణం పరుగో.. పరుగు

అధికారిక గణాంకాల ప్రకారం అక్టోబర్‌లో ద్రవ్యోల్బణం రెండేండ్ల గరిష్ఠానికి చేరి ఆర్బీఐ నిర్దేశించిన 6 శాతం పరిమితిని దాటింది. గత నెల వినియోగదారుల ధరల సూచీ (సీపీఐ) ఆధారిత రిటైల్‌ ద్రవ్యోల్బణం 6.09 శాతంగా, టోకు ధరల సూచీ (డబ్ల్యూపీఐ) ఆధారిత హోల్‌సేల్‌ ద్రవ్యోల్బణం 12.29 శాతానికి ఎగిశాయి. దీంతో ఆర్బీఐ మరింత కఠిన ద్రవ్య విధానాన్నే అనుసరిస్తుందన్న వాదన బలపడింది. దాదాపు నాలుగేండ్ల తర్వాత అక్టోబర్‌ ద్వైమాసిక ద్రవ్య పరపతి విధాన సమీక్షలో ఆర్బీఐ తొలిసారి రెపోరేటును పావు శాతం (25 బేసిస్‌ పాయింట్లు) పెంచిన విషయం తెలిసిందే. ఈ నేపథ్యంలో డిసెంబర్‌ సమీక్షలోనూ పావు శాతం పెంపు ఉంటుందన్న అంచనాలు గట్టిగా వినిపిస్తున్నాయి.

ఆటో, రియల్టీకి దెబ్బ

ద్రవ్యోల్బణం కట్టడికి వచ్చే ద్రవ్య సమీక్షల్లో రెపోరేటును ఆర్బీఐ పెంచడం ఖాయంగానే కనిపిస్తున్నది. ఇదే జరిగితే నిర్మాణ, ఆటో రంగాలకు పెద్ద దెబ్బేనన్న విశ్లేషణలుంటున్నాయి. ఇప్పటికే ఇండ్ల విక్రయాలు లేక రియల్‌ ఎస్టేట్‌ రంగం కుదేలైంది. ఈ క్రమంలో వడ్డీరేట్ల పెంపు గృహ రుణాలపై ప్రభావం చూపనున్నది. ఇప్పటికే లోన్లపై ఇండ్లు కొన్నవారికి ఈఎంఐలు భారంగా మారుతాయని, కొనాలనుకుంటున్నవారు తమ నిర్ణయాలను వాయిదా వేసుకోవచ్చని ఇండస్ట్రీ వర్గాలు అంటున్నాయి. అలాగే వాహన, వ్యక్తిగత రుణాలూ ప్రియమవుతాయన్న ఆందోళనలు వ్యక్తమవుతున్నాయి. నిర్మాణ, ఆటో వాటి అనుబంధ రంగాలు మందగమనంలోకి జారుకుంటే.. అది దేశ ఆర్థిక వృద్ధిరేటునే కుంగదీస్తుందని మార్కెట్‌ నిపుణులు హెచ్చరిస్తున్నారు. అసలే ఎల్‌ నినో దెబ్బకు అన్ని రంగాలు ఢీలాపడ్డ తరుణంలో ద్రవ్యోల్బణం పేరిట ఆర్బీఐ వడ్డీరేట్లను పెంచితే మరిన్ని రంగాలు నష్టపోతాయని సూచిస్తున్నారు.

ఇంధనం, ఆహార ధరల షాక్‌లు రెండూ ఒకేసారి వచ్చినప్పుడు వాటి ప్రభావం మరింత పెద్దదిగా ఉండవచ్చు. అందుకే పరిస్థితుల్ని చక్కదిద్దడానికి ఆర్బీఐ వడ్డీరేట్ల పెంపు అనివార్యంగానే కనిపిస్తున్నది. వచ్చే నెల ద్రవ్య సమీక్షలో రెపోరేటు 50 బేసిస్‌ పాయింట్లు పెరిగే వీలు లేకపోలేదు.

-ప్రజ్ఞుల్‌ భండారి, హెచ్‌ఎస్‌బీసీ హోల్డింగ్స్‌ పీఎల్‌సీ చీఫ్‌ ఇండియా ఎకనామిస్ట్‌

ఎల్‌ నినో కారణంగా ఏర్పడిన వర్షాభావ పరిస్థితులతో దేశీయ వ్యవసాయ రంగం దెబ్బ తింటున్నది. పంటల సాగు, దిగుబడి రెండూ పడిపోతున్నాయి. ద్రవ్యోల్బణం ఎక్కువగా ఉండటంతో వినియోగ సామర్థ్యం తగ్గిపోతున్నది. పెరుగుతున్న వడ్డీరేట్లతో రుణ లభ్యత ఖరీదెక్కుతున్నది.

-అపూర్వ జవదేకర్‌, శ్రీరామ్‌ రిసెర్చ్‌ ప్రైవేట్‌ లిమిటెడ్‌ పరిశోధన విభాగం అధిపతి

Comments (0)

User