Rahul Gandhi | SIR పై ఈసీని ప్ర‌శ్నించేందుకు అనుమ‌తి ఇవ్వండి : రాహుల్‌గాంధీ

16 November 2026 - 23:30
0 1
Rahul Gandhi | SIR పై ఈసీని ప్ర‌శ్నించేందుకు అనుమ‌తి ఇవ్వండి : రాహుల్‌గాంధీ
Rahul Gandhi Supreme Court

Rahul Gandhi : ఓట‌ర్ల జాబితా (Voters list) ప్ర‌త్యేక స‌మ‌గ్ర స‌వ‌ర‌ణ‌కు సంబంధించి ఎన్నిక‌ల సంఘాన్ని ప్ర‌శ్నించేందుకు అనుమ‌తి ఇవ్వాల‌ని కోరుతూ కాంగ్రెస్ పార్టీ (Congress Party) అగ్ర‌నేత రాహుల్‌గాంధీ (Rahul Gandhi), ఇండి కూట‌మికి చెందిన ఇత‌ర‌ విప‌క్ష నేత‌లు సుప్రీంకోర్టు (Supreme Court) లో పిటిష‌న్ వేశారు. ఈ మేర‌కు 48 ప్రశ్నలతో కూడిన ప్రశ్నావళిని సమర్పించారు. దేశవ్యాప్త ‘సర్‌’కు సంబంధించిన నిర్ణయాలను ఈసీ కలసికట్టుగా తీసుకుందా..? లేదంటే ఇతర ఎన్నికల కమిషనర్ల అంగీకారం లేకుండా సీఈసీ జ్ఞానేశ్‌ కుమార్ ఈసీ అధికారాలను వినియోగించారా..? అనే ప్ర‌శ్న కూడా అందులో ఉంది.

స్పెష‌ల్ ఇంటెన్సివ్ రివిజ‌న్‌ ఆథరైజేషన్‌, జాబితాల నుంచి ఓటర్ల తొలగింపు ఆరోపణలు, ఎన్నిక‌ల సంఘం ఆన్‌లైన్ ఎలక్టోరల్‌ నమోదు వ్యవస్థల్లో మార్పులకు సంబంధించిన అంశాలపై డిప్యూటీ ఎన్నికల కమిషనర్ నుంచి సమాధానాలను కోరారు. దేశవ్యాప్త సర్‌ ప్రక్రియకు అధికారం ఇస్తూ ఈసీ తీసుకున్న నిర్ణయం రికార్డుగా లేకపోవడం, ఆన్‌లైన్ ఫారం-6 లో చేసిన మార్పులు, ఈసీఐనెట్, ఈఆర్‌వోనెట్ ఓటర్ల జాబితా డేటాబేస్‌ల పనితీరుపై కూడా రాహుల్‌ గాంధీ, ఇతర నేతలు ప్రశ్నలు లేవనెత్తారు.

ఈ డేటాబేస్‌లు కేంద్రీకృతంగా ఉన్నాయని, పారదర్శకంగా లేవని విప‌క్ష నేత‌లు ఆరోపించారు. ఈసీ పోర్టల్‌లో చేసిన అప్‌డేట్‌లు, మార్పుల వివరాలను, వాటిని అమలు చేసిన వారి సమాచారాన్ని వారు త‌మ పిటిష‌న్ ద్వారా కోరారు. ‘సర్‌’ కు సంబంధించి తమ నిర్ణయాలన్నీ ఏకగ్రీవంగా తీసుకున్నవేనని ఈసీ ఇప్పటికే సుప్రీంకోర్టుకు తెలిపింది. దీనిని చట్ట ప్రకారమే అమలు చేశామని పేర్కొన్న‌ది. అదేవిధంగా ఫారం-6ను తాము సవరించలేదనీ తెలిపింది.

ఇదిలావుంటే ‘సర్‌’ విషయంలో సీఈసీ ఏకపక్షంగా నిర్ణయాలు తీసుకొని, ఇష్టానుసారం ఓట్లు తొలగిస్తున్నారని ఆరోపిస్తూ రాహుల్‌ గాంధీ సహా 12 మంది విపక్ష నేతలు దాఖలు చేసిన పిటిషన్‌లు ప్రస్తుతం సుప్రీంకోర్టులో పెండింగ్‌లో ఉన్నాయి. వీటిపై ఈ నెల 17 న మరోసారి విచారణ స‌ర్వోన్న‌త న్యాయ‌స్థానం విచార‌ణ‌ జరపనుంది.

Comments (0)

User