Plague Disease | ప్లేగు వ్యాధిలో అస‌లు ఎన్ని ర‌కాలు ఉన్నాయి.. ఈ వ్యాధి ఎలా వ‌స్తుంది..?

Plague Disease | అప్ప‌ట్లో.. అంటే.. 14వ శతాబ్దంలో ఐరోపాలో కోట్లాది మంది ప్రాణాలను బలిగొన్న ప్లేగు వ్యాధి ఇప్పటికీ పూర్తిగా అంతరించిపోలేదు. అయితే, ప్రస్తుతం ఈ వ్యాధిని యాంటీబయాటిక్‌ మందులతో సమర్థవంతంగా నయం చేసే అవకాశం ఉంది. ప్రపంచ ఆరోగ్య సంస్థ గణాంకాల ప్రకారం, 1990వ దశకం నుంచి ప్లేగు బారిన పడిన వారిలో ఎక్కువ మంది ఆఫ్రికా దేశాలకు చెందినవారే. ముఖ్యంగా కాంగో, మడగాస్కర్‌లో కేసులు అధికంగా నమోదయ్యాయి. అమెరికాలోనూ ఏటా సగటున ఏడుగురికి ఈ వ్యాధి సోకుతున్నట్లు అంచనా. అక్కడ గ్రామీణ ప్రాంతాల్లోనే ఎక్కువ కేసులు కనిపిస్తున్నాయి.

సైబీరియా ఘ‌ట‌న‌తో మ‌ళ్లీ తెర‌పైకి..

ఇటీవల సైబీరియాలోని ప్లేగు పరిశోధనా సంస్థలో పనిచేసే ఓ ఉద్యోగిని న్యుమోనియాతో మరణించడం రష్యాలో ఆందోళనకు దారితీసింది. ఆమెకు న్యుమోనిక్‌ ప్లేగు సోకి మరణించినట్లు కొన్ని వార్తలు వచ్చినప్పటికీ, రష్యా అధికారులు నిర్వహించిన పరీక్షల్లో ప్లేగుకు సంబంధించిన ఆధారాలు లభించలేదని ప్రకటించారు. అయినప్పటికీ ముందుజాగ్రత్త చర్యగా పరిశోధనా సంస్థను తాత్కాలికంగా నిర్బంధించారు. సైబీరియా ప్రాంతంలో వేల సంవత్సరాలుగా ప్లేగు వ్యాధి ఉన్నట్లు ఆధారాలు ఉన్నాయి. ఎలుకలు, ఇతర చిన్న క్షీరదాల్లో ఈ బ్యాక్టీరియా సహజంగా వ్యాప్తి చెందుతుంది. వ్యాధి సోకిన జంతువులపై ఉండే ఈగలు మనుషులను కుట్టడం ద్వారా సంక్రమణ జరుగుతుంది.

ఈ బ్యాక్టీరియానే కార‌ణం..

యెర్సీనియా పెస్టిస్‌ అనే బ్యాక్టీరియా వల్ల ప్లేగు వ్యాధి వస్తుంది. ఇందులో ప్రధానంగా మూడు రకాలున్నాయి. అత్యంత సాధారణమైన బ్యూబోనిక్‌ ప్లేగు కారణంగా చంకలు, మెడ, తొడల మధ్య ఉండే శోషరస గ్రంథులు వాపునకు గురై తీవ్ర నొప్పి కలుగుతుంది. అకస్మాత్తుగా అధిక జ్వరం, చలి, తలనొప్పి, పొత్తికడుపు, చేతులు, కాళ్లలో నొప్పులు కూడా కనిపిస్తాయి. న్యుమోనిక్‌ ప్లేగు ఊపిరితిత్తులకు సోకుతుంది. సెప్టిసీమిక్‌ ప్లేగు రక్తప్రవాహంలోకి బ్యాక్టీరియా చేరడం వల్ల వస్తుంది. ఈ రెండు రకాల వ్యాధులకు సకాలంలో చికిత్స అందకపోతే ప్రాణాపాయం కలుగుతుంది. బ్యూబోనిక్‌ ప్లేగుకు చికిత్స చేయకపోతే అది ఇతర తీవ్రమైన రూపాల్లోకి మారే ప్రమాదం ఉంది.

ఎలా వ్యాపిస్తుంది..

వ్యాధి సోకిన జంతువుల ఈగలు కుట్టడం మాత్రమే కాకుండా, వాటి శరీర ద్రవాలతో ప్రత్యక్షంగా సంబంధం ఏర్పడినా ప్లేగు సంక్రమిస్తుంది. అందువల్ల అనారోగ్యంతో ఉన్న లేదా చనిపోయిన జంతువులను తాకేటప్పుడు అప్రమత్తంగా ఉండాలని నిపుణులు సూచిస్తున్నారు. న్యుమోనిక్‌ ప్లేగు సోకిన వ్యక్తి దగ్గినప్పుడు వెలువడే తుంపర్ల ద్వారా ఇతరులకు వ్యాధి వ్యాపించే అవకాశం ఉన్నప్పటికీ, సాధారణంగా దగ్గరి ముఖాముఖి సంబంధం అవసరం. వ్యాధిని ప్రారంభ దశలో గుర్తించి యాంటీబయాటిక్స్‌ వాడితే నయం చేయవచ్చు. ఆలస్యం చేస్తే ప్రాణాంతకంగా మారుతుంది. అధిక ప్రమాదం ఉన్న ప్రయోగశాల, ఆరోగ్య సంరక్షణ సిబ్బందికి మాత్రమే ప్లేగు టీకాను ప్రపంచ ఆరోగ్య సంస్థ సిఫారసు చేస్తోంది. న్యుమోనిక్‌ ప్లేగును నివారించడంలో టీకా ప్రభావంపై బలమైన ఆధారాలు లేవు. అమెరికాలో ప్రస్తుతం ప్లేగు టీకా అందుబాటులో లేదు.