IndiGo Flight | విమానం ల్యాండింగ్ గేర్ ఫెయిల్‌.. పుణె ఎయిర్‌పోర్టులో అత్య‌వ‌స‌ర ల్యాండింగ్‌..!

IndiGo Flight : ల్యాండింగ్ గేర్ ఫెయిల్ కావ‌డంతో గువాహ‌టి (Guwahati) కి వెళ్లాల్సిన ఇండిగో విమానం (IndiGo flight) అత్య‌వ‌స‌రంగా పుణె ఎయిర్‌పోర్టు (Pune Airport) లో ల్యాండ్ అయ్యింది. టేకాఫ్ తర్వాత విమానం ల్యాండింగ్ గేర్ వెనక్కి ముడుచుకోకపోవడంతో పుణెకు తిరిగి వచ్చింది. ఫ్లైట్ 6E 0623 (VT-IZE) పైలట్ వెంటనే ఎయిర్ ట్రాఫిక్ కంట్రోల్ (ATC) కి సమాచారం అందించడంతో భారత వైమానిక దళం (IAF) పుణె ఎయిర్‌పోర్టులో పూర్తిస్థాయి అత్యవసర పరిస్థితిని ప్రకటించింది.

ఈ ప్రక్రియలో భాగంగా అగ్నిమాపక దళాలు, అంబులెన్స్‌లు, అత్యవసర ప్రతిస్పందన బృందాలను అత్యంత అప్రమత్తంగా ఉంచారు. 192 మంది ప్రయాణికులు, సిబ్బందితో ఉన్న ఆ విమానం ఉదయం 9:04 గంటలకు సురక్షితంగా ల్యాండ‌య్యింది. ల్యాండింగ్‌కు ముందు గ్రౌండ్ బృందాలు ల్యాండింగ్ గేర్‌ను ప్రత్యక్షంగా తనిఖీ చేయడానికి వీలుగా రన్‌వేపై తక్కువ ఎత్తులో ప్రయాణించింది. మూడు ఫైర్ ఇంజిన్‌లు, రెండు అంబులెన్స్‌ల సాయంతో ప్రయాణికులు, సిబ్బంది అందరినీ ఏరోబ్రిడ్జ్ ఉపయోగించి బే నంబర్ 7కు సురక్షితంగా తరలించారు.

ఈ ప్ర‌క్రియ‌లో ఎవ‌రికీ ఎలాంటి గాయాలు కాలేదు. ఉదయం 9:10 గంటలకు పూర్తిస్థాయి అత్యవసర పరిస్థితిని అధికారికంగా ఉపసంహరించారు.