Dhanush | ధనుష్ ‘ఓఎం’ ట్రైలర్‌లో ‘ధురంధర్’, ‘అవతార్’ ఛాయలు.. కథపై ఆసక్తికర చర్చ!

ట్రైలర్‌ను గమనిస్తే.. ధనుష్ పోషిస్తున్న పాత్రకు శత్రువుల కదలికలను గమనించి, వారి గురించి రహస్య సమాచారాన్ని సేకరించే బాధ్యత అప్పగించినట్లు కనిపిస్తోంది. ఇందుకోసం ఆయనకు ప్రత్యేక శిక్షణ కూడా ఇస్తున్నట్లు సన్నివేశాలు చూపించారు. ఈ శిక్షణ సన్నివేశాలు ఇటీవల ప్రేక్షకుల ముందుకు వచ్చిన ‘ధురంధర్’ సినిమాలో రణ్‌వీర్ సింగ్ పాత్రను గుర్తు చేస్తున్నాయని నెటిజన్లు కామెంట్స్ చేస్తున్నారు. ఇక ట్రైలర్ చివరి భాగంలో వచ్చే యాక్షన్ సన్నివేశాలు మరో ఆసక్తికరమైన చర్చకు కారణమయ్యాయి. మొదట రహస్య ఆపరేషన్ కోసం వెళ్లిన ధనుష్.. చివరకు తనకు అప్పగించిన బాధ్యతకు భిన్నంగా అదే పోలీసు బలగాలకు ఎదురుతిరుగుతున్నట్లు కనిపిస్తోంది. ఈ పరిణామాలు హాలీవుడ్ చిత్రం ‘అవతార్’ కథను గుర్తు చేస్తున్నాయని కొందరు ప్రేక్షకులు అభిప్రాయపడుతున్నారు.

‘అవతార్’ సినిమాలో కథానాయకుడు మొదట ఒక రహస్య మిషన్‌లో భాగంగా నావీ ప్రజల వద్దకు వెళ్తాడు. అయితే అక్కడి ప్రజలపై జరుగుతున్న దాడులు, అన్యాయాలను ప్రత్యక్షంగా చూసిన తర్వాత వారి పట్ల సానుభూతి పెంచుకుంటాడు. చివరకు తన సొంత బలగాలకే ఎదురుతిరిగి నావీ ప్రజల పక్షాన నిలబడతాడు. ఇప్పుడు ‘ఓఎం’ ట్రైలర్‌లోనూ ఇలాంటి తరహా పరిణామాలు కనిపిస్తున్నాయని నెటిజన్లు పోల్చి చూస్తున్నారు. అయితే కేవలం కథలోని కొన్ని అంశాలు ఒకేలా కనిపించినంత మాత్రాన సినిమా ఫలితాన్ని ముందుగానే అంచనా వేయలేం. ఒక కథను తెరపై ఎలా ఆవిష్కరించారు? కథనం ఎంత ఆసక్తికరంగా సాగుతుంది? పాత్రల మధ్య సంఘర్షణను ఎంత బలంగా చూపించారు? అనేవే ప్రేక్షకులను ఆకట్టుకోవడంలో కీలక పాత్ర పోషిస్తాయి. ఈ విషయంలో దర్శకుడు రాజ్‌కుమార్ పెరియసామి ఎలాంటి మ్యాజిక్ చేయబోతున్నారనేది ఆసక్తికరంగా మారింది. గతంలో శివకార్తికేయన్ హీరోగా ఆయన తెరకెక్కించిన ‘అమరన్’ మంచి ప్రేక్షకాదరణ పొందింది. ఎమోషనల్ కథనాన్ని, యాక్షన్ అంశాలను సమతూకంతో చూపించడంలో రాజ్‌కుమార్ పెరియసామి తన ప్రతిభను నిరూపించుకున్నారు. దీంతో ‘ఓఎం’ సినిమాపై కూడా మంచి అంచనాలు ఏర్పడ్డాయి.