Crime News | త‌ల్లిని క‌త్తితో పొడిచి, భ‌వ‌నంపై నుంచి దూకి.. తొమ్మిదో త‌ర‌గతి బాలుడి ఆత్మ‌హ‌త్య‌..!

Crime News : అస్సాం (Assam) రాజ‌ధాని గువాహ‌టి (Guwahati) లో దారుణం జ‌రిగింది. తొమ్మిదో త‌ర‌గ‌తి చ‌దువుతున్న ఓ 14 ఏళ్ల బాలుడు ఇంట్లోనే త‌న త‌ల్లిని క‌త్తిలో పొడిచాడు. ఆ తర్వాత ఇంటి నుంచి బయటకు వెళ్లి నగరంలోని వేరే ప్రాంతంలో భవనంపై నుంచి దూకి ఆత్మహత్య (Suicide) చేసుకున్నాడు. క‌త్తిపోట్ల‌తో తీవ్రంగా గాయ‌ప‌డిన‌ బాధితురాలు చంద్రాని కలిత (Chandrani Kalita) గువాహ‌టి మెడికల్ కాలేజీ అండ్ హాస్పిటల్‌లోని ఇంటెన్సివ్ కేర్ యూనిట్ (ICU) లో చికిత్స పొందుతున్నారు.

అయితే 9వ తరగతి చదువుతున్న 14 ఏళ్ల బాలుడు తన తల్లిపై దాడి చేశాడనే ఆరోపణల‌ను కుటుంబసభ్యులు ఖండించారు. ఈ ఘ‌ట‌న‌లో మూడో వ్య‌క్తి ప్ర‌మేయం ఉన్న‌ట్లు త‌మ‌కు అనుమానంగా ఉంద‌ని, కాబ‌ట్టి ఈ ఘటనపై సమగ్ర విచారణ జరపాలని వారు పోలీసులను కోరారు. కుటుంబసభ్యుల కథనం ప్రకారం.. శుక్రవారం మధ్యాహ్నం సుమారు 2:15 గంటలకు బాలుడు తన తల్లితో కలిసి పాఠశాల నుంచి ఇంటికి వచ్చాడు. సుమారు 3:45 గంటలకు అతను బయటకు వెళ్లిపోయాడు. ఆ సమయంలో ఇంట్లో ఏం జరిగిందనేది స్పష్టంగా తెలియాల్సి ఉంది.

దాడి విష‌యం తెలిసి తాను ఇంట్లోకి వెళ్లేస‌రికి త‌న చెల్లెలు చంద్రాని క‌లిత‌ ర‌క్త‌పు మ‌డుగులో ప‌డి ఉన్న‌ద‌ని, పదేపదే “నా కొడుకు చేసిన తప్పేంటి?” అని అడిగిందని బాధితురాలి అక్క ఇంద్రాణి క‌లిత‌ తెలిపారు. ఇంట్లో చంద్రాని, ఆమె కుమారుడు ఒంటరిగా ఉన్నప్పుడు ఇద్దరి మధ్య ఏం జరిగిందో తమకు స్పష్టంగా తెలియదని చెప్పారు. ఈ ఘటనలో మూడో వ్యక్తి ప్రమేయం ఉండవచ్చని తాము అనుమానిస్తున్నామ‌ని, సరైన పోలీసు విచారణ జరిగితేనే నిజం బ‌య‌టికి వ‌స్తుంద‌ని అన్నారు.