Bodies of SPOs | దారుణం.. శ‌వ‌పేటిక‌లు లేకుండా డంప‌ర్‌లో పోలీసుల మృతదేహాలు త‌ర‌లింపు..!

Bodies of SPOs : ఇటీవ‌ల కిష్ట్‌వార్‌ (Kishtwar) లో జరిగిన ఉగ్రవాదుల (Terrorists) దాడిలో ప్రాణాలు కోల్పోయిన ఇద్ద‌రు ప్రత్యేక పోలీసు అధికారుల (SPOs) మృతదేహాలను ఒక డంపర్‌లో వారి స్వగ్రామానికి పంపించారు. ఈ ఘ‌ట‌న తీవ్ర ఆగ్రహానికి, దుఃఖానికి కారణమైంది. వీర‌మ‌ర‌ణం పొందిన‌ SPOలు బాబీచంద్, రష్పాల్ కుమార్‌ల మృతదేహాలను శవపేటికలు లేకుండా డంపర్‌లో వారి స్వగ్రామానికి తీసుకురావడంతో కియార్ గ్రామంలో నెలకొన్న విషాద వాతావరణం ఆగ్రహంగా మారింది.

ఈ ఆగ్రహంలోనే గ్రామ‌స్తులు వారికి పూర్తి గౌరవప్రదంగా అంత్యక్రియలు నిర్వహించారు. మృతదేహాలతోపాటు ఏ ఉన్నతాధికారి కూడా రాలేదని వారు తెలిపారు. విధి నిర్వహణలో ప్రాణాలు అర్పించిన ఆ ఇద్దరు వీరయోధులను సాధారణ వస్తువులలా తరలించడంతో అప్ప‌టికే తీవ్ర దుఃఖంలో ఉన్న కుటుంబస‌భ్యులు, గ్రామస్తులు దిగ్భ్రాంతికి గుర‌య్యారు. అధికారుల తీరుపై ఆగ్రహం వ్య‌క్తంచేశారు.

బీజేపీ నాయకుడు, జమ్మూకశ్మీర్ ప్రతిపక్ష నేత‌ సునీల్ శర్మ, కిష్ట్‌వార్ శాసనసభ్యురాలు షగున్ పరిహార్ ఈ ఘ‌ట‌న‌పై తీవ్రంగా స్పందించారు. దేశం కోసం ప్రాణాలు అర్పించిన సిబ్బంది మృతదేహాలను ఇంత అవమానకరంగా ఎలా చూస్తార‌ని ప్రశ్నించారు. మృతదేహాలను తరలించడానికి తమకు కనీసం ఒక స్ట్రెచర్ కూడా ఇవ్వలేదని గ్రామస్తులు ఆరోపించారు. చివరికి సైన్యం నుంచి ఒక స్ట్రెచర్ తీసుకోవాల్సి వచ్చిందన్నారు. మృతదేహాన్ని కప్పడానికి తెల్లటి వస్త్రాన్ని కూడా తామే స్వయంగా సంపాదించుకున్నామ‌ని ఆరోపించారు.