AP News | నిత్యావ‌స‌రాల ధ‌ర‌లు పెంచి విజ‌న్ క‌బుర్లు ఎందుకు.. కూట‌మి స‌ర్కారుపై వైసీపీ ఫైర్‌..!

AP News : ఏపీ సీఎం చంద్రబాబు ప్రతిపాదిస్తున్న ‘విజన్ 2050’ పై ప్ర‌తిప‌క్ష‌ వైసీపీ తీవ్ర విమర్శలు చేసింది. రాష్ట్రంలో క్షేత్రస్థాయి పరిస్థితులు, సామాన్య ప్రజలు ఎదుర్కొంటున్న సమస్యలను గాలికొదిలేసి ప్రభుత్వం కాలక్షేపం చేస్తోంద‌ని ఆరోపించింది. ఆదివారం మీడియాతో మాట్లాడిన మాజీ మంత్రి ధర్మాన ప్రసాదరావు.. రాష్ట్రంలో నిత్యావసర వస్తువుల ధరలు ఆకాశాన్నంటుతుంటే చంద్రబాబు విజన్ 2050 గురించి మాట్లాడటం విడ్డూరంగా ఉందన్నారు.

ప్రస్తుత సమస్యల నుంచి ప్రజల దృష్టిని మళ్లించడానికే ఇలాంటి దీర్ఘకాలిక ప్రణాళికల పేరిట ప్రచారం చేస్తున్నారని ధ‌ర్మాన‌ ఆరోపించారు. రాష్ట్రంలో సామాన్యుడి కొనుగోలు శక్తి ఘోరంగా పడిపోయిందని, ప్రజల జీవనం తీవ్ర ఇబ్బందుల్లో పడిందని పేర్కొన్నారు. 2024 నాటి ధరలతో పోలిస్తే ప్రస్తుతం నిత్యావసరాలు, ఇంధన ధరలు విపరీతంగా పెరిగాయని ధర్మాన అన్నారు. విద్యుత్ ఛార్జీల పెంపు సామాన్య ప్రజలపై తీవ్ర భారాన్ని మోపిందని చెప్పారు.

ఎన్నికల్లో ఇచ్చిన హామీలను గాలికి వ‌దిలేసిన ప్రభుత్వం.. బిజినెస్ సమ్మిట్‌ల పేరుతో విలువైన భూములను చౌకగా ఇతరులకు కట్టబెడుతోందని ధ‌ర్మాన విమర్శించారు. ప్రజా సమస్యలను పట్టించుకోని ఇలాంటి విధానాలను ప్రజలు తిరస్కరించాలని పిలుపునిచ్చారు. మరోవైపు మాజీ సీఎం జగన్ కుటుంబసభ్యులను లక్ష్యంగా చేసుకుని సామాజిక మాధ్యమం ‘ఎక్స్’ స్పేసెస్‌లో అసభ్యకర వ్యాఖ్యలు చేయడంపై వైసీపీ రాష్ట్ర మహిళా విభాగం వర్కింగ్ ప్రెసిడెంట్ కాకాని పూజిత తీవ్ర ఆగ్రహం వ్యక్తంచేశారు.