మేడిగడ్డ వద్ద ఇసుక దందా

22 November 2026 - 06:30
0 0
మేడిగడ్డ వద్ద ఇసుక దందా
Sand
  • బరాజ్‌ భద్రతను గాలికొదిలేసిన సర్కార్‌
  • బరాజ్‌ మరమ్మతులపై నిర్లక్ష్యం
  • ఇసుక క్వారీలపై ప్రత్యేక శ్రద్ధ
  • నిత్యం వందలాది లారీలతో ఇసుక తరలింపు
  • కాంగ్రెస్‌ సర్కార్‌ తీరుపై ప్రజల ఆగ్రహం

మహదేవపూర్‌, నవంబర్‌ 21 : జయశంకర్‌ భూపాలపల్లి జిల్లా మహదేవపూర్‌ మండలం అంబట్‌పల్లిలోని కాళేశ్వరం ప్రాజెక్ట్‌లో అంతర్భాగమైన మేడిగడ్డ బరాజ్‌ పునరుద్ధరణ పనులను పకనపెట్టిన సర్కార్‌.. బరాజ్‌ పరిసరాల్లో క్వారీలకు అనుమతులిచ్చి ఇసుక దందాకు తెరలేపిందన్న విమర్శలు వెల్లువెత్తుతున్నాయి. బరాజ్‌కు ఏర్పడిన చిన్నపాటి సమస్యలను పరిషరించి తిరిగి వినియోగంలోకి తీసుకురావడంపై నిర్లక్ష్యం ప్రదర్శిస్తూనే, మరోవైపు నిత్యం వందలాది లారీల ద్వారా ఇసుకను ఇతర ప్రాంతాలకు తరలించడంపై స్థానికులు తీవ్ర ఆగ్రహం వ్యక్తంచేస్తున్నారు.

రాష్ట్రంలో సాగు, తాగునీటి సమస్య నెలకొన్న ప్రస్తుత తరుణంలో మేడిగడ్డ బరాజ్‌ మరమ్మతు, పునరుద్ధరణపై ప్రభుత్వం తగిన శ్రద్ధ చూపడం లేదని రైతులు, ప్రజలు విమర్శిస్తున్నారు. బరాజ్‌లో సమస్యలను పరిషరించకుండా, దాని పరిసరాల్లో ఇసుక క్వారీల నిర్వహణకు ప్రాధాన్యం ఇవ్వడం వెనుక ఆంతర్యమేమిటని ప్రశ్నిస్తున్నారు. బరాజ్‌ పరిసర ప్రాంతాల్లో నిత్యం వందలాది ఇసుక లారీలు రాకపోకలు సాగిస్తుండటంతో ఆ ప్రాంతమంతా దద్దరిల్లుతున్నది. భారీ వాహనాల రాకపోకలు, ఇసుక తవ్వకాల ప్రభావం బరాజ్‌ భద్రతపై ఎలాంటి ప్రభావం చూపుతుందోనని ప్రజలు ఆందోళన చెందుతున్నారు. బరాజ్‌కు ముప్పు వాటిల్లే పరిస్థితులు ఏర్పడకముందే ప్రభుత్వం స్పందించి నిపుణులతో సమగ్ర పరిశీలన చేయించాలని డిమాండ్‌ చేస్తున్నారు.

బరాజ్‌ వద్ద ఇసుక క్వారీల్లో అక్రమాలు!
మేడిగడ్డ బరాజ్‌ ప్రాంతంలో ఇసుక క్వారీల నిర్వహణపై ఆరోపణలు వెల్లువెత్తుతున్నాయి. నిత్యం వందల సంఖ్యలో లారీలు, టిప్పర్ల ద్వారా ఇసుక తరలిస్తుండగా, క్వారీల వద్ద నిబంధనలకు విరుద్ధంగా అదనపు వసూళ్లు జరుగుతున్నాయనే విమర్శలు వినిపిస్తున్నాయి. తెలంగాణ మినరల్‌ డెవలప్‌మెంట్‌ కార్పొరేషన్‌ (టీజీఎండీసీ) ఆధ్వర్యంలో మేడిగడ్డ, ఎలేశ్వరం తదితర ప్రాంతాల్లో ఇసుక క్వారీలు కొనసాగుతున్నాయి. క్యూబిక్‌ మీటర్ల పరిమాణం, టిప్పర్ల సామర్థ్యం ఆధారంగా నిబంధనల ప్రకారం డీడీలు చెల్లించి ఇసుక తీసుకెళ్తున్నప్పటికీ, క్వారీల వద్ద ఒకో టిప్పర్‌కు అదనంగా రూ.2 వేల వరకు వసూలు చేస్తున్నట్టు లారీ యజమానులు ఆరోపిస్తున్నారు. నిర్ణీత పరిమాణానికి మించి అదనంగా ఇసుక లోడ్‌ చేయాలంటే రూ.వెయ్యి నుంచి రూ.3 వేల వరకు దండుకుంటున్నారని పలువురు టిప్పర్‌ యజమానులు చెప్తున్నారు. దీనిపై ప్రశ్నిస్తే ఇదే విధానమంటూ సమాధానం ఇస్తున్నారని ఆవేదన వ్యక్తంచేస్తున్నారు. క్వారీల వద్ద జరుగుతున్న అదనపు వసూళ్లపై సమగ్ర విచారణ చేపట్టి, రాత్రిపూట ఇసుక రవాణా, ఓవర్‌ లోడింగ్‌ ఆరోపణలపై తనిఖీలు చేపట్టాలని డిమాండ్‌ చేస్తున్నారు.

Comments (0)

User