పింఛన్ల పెంపు ఏదీ ? : లకావత్ గిరిబాబు

జూలూరుపాడు, నవంబర్ 17 : కాంగ్రెస్ ప్రభుత్వంపై రోజురోజుకూ పెరుగుతున్న వ్యతిరేకతను కప్పిపుచ్చుకునేందుకే కొత్త పింఛన్ల పేరుతో సర్కారు నాటకాలు ఆడుతోందని బీఆర్ఎస్ వైరా నియోజకవర్గ నాయకుడు లకావత్ గిరిబాబు అన్నారు. ఎన్నికల సమయంలో ప్రజలకు ఇచ్చిన హామీలను అమలు చేయడంలో ముఖ్యమంత్రి రేవంత్ రెడ్డి పూర్తిగా విఫలమయ్యారన్నారు. కాంగ్రెస్ పార్టీ అధికారంలోకి వస్తే దివ్యాంగుల పింఛన్ను రూ.4 వేల నుండి రూ.6 వేలకు, ఇతర ఆసరా పింఛన్లను రూ.2 వేల నుండి రూ.4 వేలకు పెంచుతామని గొప్పలు చెప్పిందని ఎద్దేవా చేశారు. హామీ ఇచ్చి మూడేళ్లు గడుస్తున్నా నేటికీ ఎందుకు అమలు చేయడం లేదో ముఖ్యమంత్రి సమాధానం చెప్పాలన్నారు. కొత్తగా అర్హత సాధించిన వృద్ధులు, బీడీ కార్మికుల నుండి కనీసం దరఖాస్తులు కూడా స్వీకరించకుండా ప్రభుత్వం అత్యంత నిర్లక్ష్యంగా వ్యవహరిస్తోందని ఆగ్రహం వ్యక్తం చేశారు. కేవలం కొత్త పింఛన్ల పేరుతో ప్రకటనలకే పరిమితం కాకుండా, ఎన్నికల్లో ఇచ్చిన హామీ మేరకు పింఛన్ మొత్తాలను వెంటనే పెంచాలని ఆయన డిమాండ్ చేశారు.
Comments (0)