కస్తాలలో సబ్ స్టేషన్ ముందు రైతుల నిరసన

చండూరు, అక్టోబర్ 16 : చండూరు మండలం కస్తాల గ్రామంలో రైతులు విద్యుత్ అధికారులపై తిరగబడ్డారు. వ్యవసాయానికి నిరంతరాయంగా 12 గంటల నాణ్యమైన విద్యుత్ ఇవ్వాలని డిమాండ్ చేస్తూ కస్తాల గ్రామంలోని సబ్ స్టేషన్ ముందు శుక్రవారం నిరసనకు దిగారు. పొలాల్లో పని వదిలేసి పెద్ద సంఖ్యలో రైతులు సబ్ స్టేషన్ ముందు బైఠాయించి తమ ఆవేదనను వినిపించారు. చండూరు మండల పరిధిలోని కస్తాల గ్రామంలో రైతుల పరిస్థితి దయనీయంగా మారింది. పంటలు పండించాలని ఆశతో పొలాల్లోకి దిగిన రైతులు కరెంటు లేక తమ కండ్ల‌ ముందే పంటలు ఎండిపోతుంటే ఏమీ చేయలేక కన్నీరు పెడుతున్నారు. ఈ సందర్భంగా పలువురు రైతులు మాట్లాడుతూ పంట చేతికి వచ్చే కీలక సమయంలో నీరు అందకపోతే రైతు జీవితమే నాశనం అవుతుందని, పెట్టిన పెట్టుబడి కూడా తిరిగి రాకపోవడం వల్ల అప్పుల పాలవుతాం అని ఆవేదన వ్యక్తం చేశారు. ప్రస్తుతం ఇచ్చే కరెంటు పంటలకు ఏ మాత్రం సరిపోవడం లేదని రైతులు ఆవేదన వ్యక్తం చేశారు.

వరి, పత్తి, కూరగాయ పంటలు నీరు లేక వాడిపోతున్నాయని, ఇదే పరిస్థితి కొనసాగితే పంట చేతికి రాకుండా పోతుందని ఆందోళన వ్యక్తం చేస్తున్నారు. దేశానికి అన్నం పెట్టే రైతన్నకు రోజుకు 12 గంటల కరెంటు ఇవ్వాలని, అది కూడా ఉదయం 5 గంటల నుండి సాయంత్రం 5 గంటల వరకు నిరంతరాయంగా, నాణ్యమైన విద్యుత్తు ఇవ్వాలని కోరుతున్నారు. పలుమార్లు పై అధికారులకు విన్నవించుకున్న అధికారులు పట్టించుకోవడం లేదని ఆగ్రహం వ్యక్తం చేసిన రైతులు శుక్రవారం సబ్ స్టేషన్ ముందు నిరసనకు దిగారు. “మాకు 12 గంటల కరెంటు కావాలి”, “రైతులను కాపాడండి”, “పంటలు ఎండిపోతున్నాయి అంటూ నినాదాలు చేశారు. అధికారులు తమ సమస్యను పరిష్కరించే వరకు పోరాటం ఆపబోమని, అవసరమైతే మరింత పెద్ద ఎత్తున ఆందోళన చేస్తామని రైతులు హెచ్చరించారు. ఈ కార్యక్రమంలో కస్తాల, మెండువారిగూడెం, గోపిడి వారి గూడెం, ఉడతల పల్లి గ్రామాల రైతులు పాల్గొన్నారు.