ఏజెంట్ల ఆగడాలుఏజెంట్ల ఆగడాలు

20 November 2026 - 05:30
0 0
ఏజెంట్ల ఆగడాలుఏజెంట్ల ఆగడాలు
Kkk
  • ఖైరతాబాద్‌ జేటీసీ కార్యాలయంలోకి చొచ్చుకెళ్లే యత్నం
  • తమ కార్యకలాపాలను నిలువరించడంపై ఆగ్రహం

సిటీబ్యూరో, నవంబర్‌ 19 ( నమస్తే తెలంగాణ ) : ఖైరతాబాద్‌ ఆర్టీఏ కార్యాలయంలో మరోసారి ఏజెంట్లు హల్‌చల్‌ చేశారు. ఇటీవల ఆర్టీఏ కార్యాలయాల్లోకి ఏజెంట్ల ప్రవేశాన్ని నిలిపివేశారు. అయితే తమ కార్యకలాపాలు ఎలా సాగుతాయని కొందరు ఏజెంట్లు గురువారం నేరుగా ప్రధాన ద్వారం నుంచి హైదరాబాద్‌ ఇన్‌చార్జి జేటీసీ వెంకటరమణ కార్యాలయానికి చొచ్చుకెళ్లే ప్రయత్నం చేశారు. ఈ క్రమంలో గేటు వద్ద విధులు నిర్వర్తిస్తున్న సెక్యూరిటి సిబ్బంది అప్రమత్తమై వారిని నిలువరించే యత్నం చేశారు. వారిని దాటుకొని హైదరాబాద్‌ జేటీసీ కార్యాలయంలోకి వెళ్లే ప్రయత్నం చేయగా సిబ్బంది వారిని ఆపేశారు. దీంతో సదరు ఏజెంట్లు లోపలికి అనుమతించాలని డిమాండ్‌ చేశారు. ఈ క్రమంలో జేటీసీ వెంకట రమణ వారిని తన కార్యాలయంలోకి అనుమతించి చర్చించారు. ఏజెంట్ల ఎంట్రీకి అనుమతి లేదని, ఎటువంటి అక్రమాలకు తావులేకుండా సేవలు అందుతాయని వారికి వివరించారు. ఈ క్రమంలో ఏజెంట్లను అక్కడ్నుంచి పంపిచేశారు.

ఏజెంట్ల చేతుల్లోనే..

నగరంలో మేడ్చల్‌, కూకట్‌పల్లి, బండ్లగూడ, ఇబ్రహీంపట్నం ఆర్టీఏ కార్యాలయాలు ఏజెంట్ల కార్యకలాపాలకు అడ్డాగా మారాయి. వీరికి కొందరు అధికారుల సపోర్ట్‌ ఉండటంతో ఒక్కో పనికి ఒక్కో రేటు నిర్ణయించి డబ్బులు దండుకుంటున్నట్టు వాహనదారులే చెబుతున్నారు. ఆన్‌లైన్‌ సేవలు అందుబాటులో ఉన్నప్పటికి అందులో సాంకేతిక సమస్యలు వెంటాడుతున్న దరిమిలా వాహనదారులు అంతా ఏజెంట్లను ఆశ్రయించే పరిస్థితులు మరింత పెరగాయని తెలిపారు. ఆన్‌లైన్‌ సమస్యలను సంబంధిత ఆర్టీఏ కార్యాలయాల్లోని అధికారుల దృష్టికి తీసుకెళితే వాళ్లంతా సెంట్రల్‌ పోర్టల్‌ సమస్యలు అంటూ అంతటా అలానే సమస్యలు ఉన్నాయని దాటేస్తున్నారు. దీంతో వాళ్లంతా ఏజెంట్లు చెప్పిన సొమ్ము అప్పజెప్పాల్సిన పరిస్థితి ఏర్పడింది.

అధికారికి వివరించిన ఆ సమస్యనే ఏజెంట్‌ ద్వారా వెళితే ఒకే రోజులో పరిష్కారమైందని ఓ వాహనదారుడు పేర్కొన్నాడు. ఎల్‌ఎల్‌ఆర్‌ నుంచి శాశ్వత లైసెన్స్‌, వాహన బదిలీ, ఫిట్‌నెస్‌ తదితర సేవలకు నేరుగా వెళితే సేవలు అందడం లేదని వాపోయారు. కాగా ఏజెంట్ల దందాలో కొందరు అధికారులు సంబంధిత కింది స్థాయి సిబ్బందిని సమన్వయం చేసి అక్రమాలకు పాల్పడుతున్నారనే ఆరోపణలు వెల్లువెత్తుతున్నాయి. మరోవైపు ఏజెంట్ల ఆగడాలను నిలువరించే ప్రయత్నం చేస్తే నేరుగా ఉన్నాధికారుల కార్యాలయాల్లోకే చొచ్చుకెళ్లే యత్నం చేసి బెదిరింపులకు దిగుతున్నారనే విమర్శలు వస్తున్నాయి. సీసీ కెమెరాలు నిఘా ఉన్నా కొన్ని కార్యాలయాల్లో కొన్ని సమయాల్లో అవి పనిచేయకుండా కొందరు అధికారులు చక్రం తిప్పుతున్నట్టు తెలుస్తోంది.

Comments (0)

User